Manong... Para!!!

Ambaho ng katabi ko sa jeep. Nakakahilo ang amoy niya. Mas pipiliin ko pang langhapin ang nilalabas na usok ng mga smoke-belchers sa EDSA kesa singhutin ang anghit niya.

At hindi lang yun: babae siya.

Mahaba ang buhok niya, pero parang ilang linggo nang hindi naliguan. May kaitiman ang kulay ng balat niya, parang champoradong OA sa gatas. Ayos lang naman eh, kahit na malagkit at naninikit na ang braso niya sa braso ko. Amoy pawis, usok at isa pang kabahuan na hindi ko maisip kung ano. Kahit gaano pa kabalis makipag-drag race, err... "magmaneho" ang driver ng jeep ay hindi pa rin maiwan iwan ang amoy niya. Mga dalawang kilometro palang mula sa pinagsakyan ko, hindi ko na natagalan. Bumaba rin ako ng jeep, at sumakay ng FX.

Marami akong kinakaasaran sa mundo ng pagco-commute. Naiinis ako kapag mahirap sumakay ng FX o jeep, kapag may amoy na hindi kaaya-aya ang nasakyan ko, kapag walang panukli ang nasakyan ko, kapag walang baryang panukli ang nasakyan ko, kapag hindi ako nasuklian ng nasakyan ko at kapag ilang libong taon na akong sumisigaw nga "PARA!" at hindi pa rin tumitigil ang nasakyan ko. Pero mas asar ako sa mga taong hindi ata alam ang salitang "PRIVACY".

Naranasan mo na ba na nasa isang lugar, sabihin na nating sa LRT (naks, purple line!), masaya kang nakikipagtext sa kaibigan mo nang mapansin mong si Manong Number 1- tawagin natin siyang si "MN1"- ay binabasa ang mga text mo. Hinayaan mo lang siya, pero makalipas ang ilang istasyon, nakikibasa parin at nakikitawa na siya! Aba! Close kayo?

Eh naranasan mo na ba na si Manong Number 2 (MN2) ay sobra naman ang bukaka sa jeep? Kulang na lang eh angkinin niya ang buong jeep sa upo niya... Upong sampung piso siya, samantalang ikaw, upong bentsingko.

Yung iba naman, si Manong Number 3 (MN3), mahilig ihampas sa mukha mo ang braso niya. Yung nakahawak si MN3 sa... sa... pasensiya na hindi ko maalala kung ano ang tawag, basta yung tubo na hawakan sa loob ng jeep. Doon nakahawak siya at sobrang extended ang braso niya na pati buhok ng kilikili niya nakadikit na sa ilong mo.

Hindi lang yan... marami pa. Mga bastos na nanghihipo ng pwet kapag pasakay ka o pababa, mga sumisigaw ng "hi miss!" sa kalsada, mga sobrang pawis at putik (hindi ko kasalanan!), mga tulo-laway habang padampi-dampi ang ulo nila sa balikat mo, mga OA sa dalang gamit na pati ikaw eh patungan na. Mga "pet peeves" kumbaga sa mundo ng mga commuter. At lahat yan, sanayan lang.

Pero ano nga ba ang gusto kong ikalat sa inyo? Ah, yung mabaho kong katabi. Mabaho talaga siya, kaamoy ng isang nationality. Nung nasa FX na ako, nahiya ako sa sarili ko. Sino nga ba ako para husgahan siya bilang isang tao gamit lamang ang amoy niya? Ano ba ang nalalaman ko tungkol sa kanya? Wala... kaya pasikreto na lang akong humingi ng tawad sa mga naisip ko habang katabi siya.

Sadyang mabilis ata ang karma. Pagbaba ko ng FX, may rumagasang jeep at natalsikan ako ng putik- mula ulo hanggang paa. Isa pa ito, pagcocommute habang umuulan... pero ibang kwento na yan.



credits to http://www.peyups.com/