Mga Pinoy na Aswang

Lecture 101. Aswang. Maraming nagsasabing kathang-isip lang ang mga ito at hindi dapat paniwalaan. Kasama lang daw sa ating makulay na alamat ang mga ito tulad na lamang ng alamat ni Maria Makiling, Bernardo Carpio, mga Diwata at mga dwende at marami pang iba. Pero isipin mo naman, nakarating na ang tao sa buwan at computerized na ang bawat takbo ng buhay pero marami pa ring naniniwala sa aswang. Ano nga ba sila? Sabi ng mga matatanda, sila ay mga nilalang na di nabasbasan ng Panginoon noon'g araw na bumaba ito sa lupa at naghatid ng biyaya.

Ngayon kung tatanungin mo ko kung naniniwala ako sa aswang, oo ang isasagot ko. Maraming kilay ang magtataasan pero bilang Pilipino, naniniwala ako sa mga kwento ng aking mga lolo't lola tungkol sa mga aswang.

Pero alam nyo ba na may iba't ibang uri ng Aswang? Ayon sa aking nabasang libro na B1Gang, may limang uri ng aswang. Ito'y ang mga sumusunod:


1. Bampira - ang ugat nito ay nanggaling sa European at American Lower Mythology. Kung si Edward Cullen ng Twilight, New Moon, Eclipse, Breaking Dawn at Midnight sun ay ngipin ang ginagamit, ang pinoy vampire ay mayroong matutulis at mahahabang dila. Ibig sabihin, sanay sila sa torrid kissing (biro lang!). Amalanhig ang tawag sa bampira sa West Visayas, Danag sa Isneg at mandurugo sa katagalugan.


2. Viscera Suckers - nagkakaroon ng pakpak at nahahati ang katawan. Manananggal sa katagalugan, Abat sa mga West Visayas, buruka sa Ilocos at aswang na lupad sa Bicol. Paboritong biktima nito ang mga buntis.


3. Werebeast - kiwig ang tawag ng mga taga-aklan at malakat sa Cebu. Ito ay mga tao'ng may kakayahang mag-anyong hayop pagsapit ng hatinggabi. Pero di gaya ni Jacob na nagiging werewolf, ang anyo ng pinoy na werebeast ay itim na aso o malaking baboy.


4. Mangkukulam - alam na natin ang ginagawa nito. Pag nagalit sa isang tao ay kukulamin niya ito sa pamamagitan ng manikang basahan na tutusukin ng karayom. Ang iba naman ay uutusan ang mga inaalagaang insekto na pumasok sa katawan ng kagalit na unti-unting papatay sa biktima. Mambabarang ang tawag sa kanila sa Bicol, manggagamod sa Ilocos at Pangasinan at mamumuyag sa West Visayas.


5. Carrion-eaters o ghouls. Ang gawain ng mga ito ay mag-abang ng mamamtay at nakawin iyon para kainin. Ito ang pinakamababang uri ng aswang. Balbal ang tawag sa mga ito ng mga Tagbanuas, Busaw sa mga Bagobos, segben sa mga taga East at West Visayas at wirwir sa mga taga Kalinga Apayao.


At iyan ang limang uri ng aswang. Totoo man o hindi, walang mawawala kung tayo'y maniniwala. Iba pa rin ang nag-iingat. Pero alam nating lahat na ang tanging pananalig sa May Likha ang tanging makapagliligtas sa atin.