Byaheng Bus Naman Tayo! (The Bus!)

Bus. Isang pampublikong sasakyan na palagi ko'ng sinasakyan tuwing ako'y papasok sa pinagtatrabahuhang BPO company. Sa aking schedule na 11:30pm, umaalis ako ng bahay ng bandang alas-diyes ng gabi lulan ng bus byaheng Alabang-Cubao. Dumadating ako sa Shaw ng alas-onse ng gabi kasama na ang traffic. Madalas ay airconditioned ang aking sinasakyan para hindi ko masagap ang lahat ng alikabok sa EDSA. Sumasakay lamang ako ng ordinary bus kung gusto ko'ng mapabilis ang buhay este byahe. At sa bawat byahe tulad ng byaheng jeepney, may kaakibat na mga kwento't eksena ang byaheng ito.

***************

Ewan ko kung ako lang ang nakakatiyempo nito pero tuwing magpapalabas ng pelikula ang konduktor at driver, palaging pelikulang tagalog ang ipinapalabas. Wala sanang masama dito kaso naman, laging pelikula ni Jeric Raval, Raymart Santiago at Eddie Garcia ang palabas. Nakabisado ko na ang kanta ni Eddie na:

"Sa silong ni kaka, may tao'ng nakadapa. kaya pala nakadapa, nanghuhuli ng palaka. Palakan'g may buhok, ipin ay nakalubog. Ang kulay nito'y itim, hindi naman sunog."

Kung hindi naman, mga pelikula ni Andrew E tulad ng Alabang Girls at Extrang Hero. Mas ok sana kung mga pelikula ng star cinema ang palabas eh tulad ng Miss You Like Crazy nina John Lloyd at Bea.Naalala ko tuloy ang paborito ko'ng line dun na:


"Kung pinagtagpo man tayo ulit maybe it's not for happy ending. Maybe it's just a second chance to end things."


Hehehe.Pero kung byaheng probinsiya ka naman katulad ng Victory Liner na papuntang Dagupan o Baguio, madalas natitiyempuhan ko ang concert ni Michael Jackson o ni Charice. Kung lalong swerte, mga marathon ng Final Destination, Saw at iba pang nakakadiring pelikula. Sabayan pa ng pagdaan sa zigzag, siguradong magpupuke (susuka!) ka!.


***************

Nakakatuwa din ang mga pagakyat ng iba't ibang vendor kasabay ng kanilang mga script kung paano ibebenta ang kanilang produkto:

Tindero ng Mani: O mani kayo dyan ma'am sir. Mainit pa oops yung bata po baka mapaso. Iodized salt po ang ginamit panlaban sa goiter ma'am sir. Bago'ng luto ma'am sir may lima may sampu.

Tindero ng Chirchirya: Piatus, Nuva, Banana cheps. Skypleks. Skypleks Banana cheps, Nuva, Piatus. (Repeat until fade)
Tindero ng Dyaryo: Diyaro kayo diyan diyaryo. Mainit na balita pasok sa banga! Diyaryoooooo (sa tono ng Jai Ho)

***************

Meron namang eksena na involve ang konduktor at pasahero. Sigaw ng sigaw ang konduktor kung sino pa ang walang ticket.

"Sinu pa po yung walang ticket dyan pakisuyo na lang po!"

Binibilang nya ang lahat ng sakay nito. To'ng pasahero naman na ayaw magbayad at umaasang makakapag-123 sa bus eh hindi kikibo, maglalagay ng earphone kahit walang ipod o kaya nama'y magtutulug-tulugan. Eh di wala nang choice ang konduktor kundi magcheck ng ticket. Dun na malalaman ng pasahero na wa-epek ang palusot kaya naman sya na ang tatawag dito para magbayad. Sermon naman ang aabutin nya sa inis ng konduktor dahil halos malito na kung sino ang wala pang ticket. (Kaunting kaalaman sa hindi pa nakakasakay ng bus, ang ticket ay binibigay kapalit ng perang ibabayad mo sa konduktor bilang pruweba na ika'y bayad na)


***************

Syempre hindi mawawala ang mga conyo-conyohang nilalang sa bus. Dalawang babae at isang bading ang sumakay sa Ayala Makati. Eto na, sinapian na ng kaluluwa ni Kris Aquino sa galing nilang mag-Taglish.

"It's like you know naman diba? We can bili naman the Nike shoes kasi it's so mura for only 5,000 pesos! It's like our 3-day salary lang! Carry!" Hong yobong sa sweldo!
Eh bumanat yung isa. "By the way, you know the song of Sarah? Yung 'HELP'?"

"What's that song girl?" sagot ng bading

"My God! yung "help" nga! it goes something like this: Help! Help could you say you love me!"
How could you say you love me ang title nun hoy!!!


***************

Meron namang makulit na babae kasama ang 1 taon'g gulang na anak nya (huwag mo nang itanong kung paano ko nalaman na 1 year old na yung bata) ang biglang pumara sa gitna ng flyover. Malamang hindi siya pabababain ng driver. May gana pa syang magalit dahil pwede daw magbaba dun. Di nako nakatiis, umepal na ko (oo epaloidz ako minsan hehehe):

"Sige ate baba ka ng flyover pero iwan mo yang anak mo para hindi na madamay sa pagpapakatiwakal mo! Kung gusto mo'ng mamatay wag mo'ng idamay yang bata! Nakita mo'ng nasa gitna tayo ng flyover, panay ang para mo!"

Tahimik na siya at naupo na lang muli.


***************

Hindi rin mawawala ang mga "out of school youth" na biglang sasakay ng bus at mag-aabot ng computerized na note na may mensahe na :

"I'm an out of school youth selling special pastillas and macapuno to support my financial needs and studies."

tapos sa baba ng sulat nakalagay ang presyo ng tinda. Pero ang matindi eh yung nakabold letters na:


"Donasyon na lamang po kung hindi bibili"


At dahil paborito ko ang pastillas at dala na rin ng "habag", madalas ako'ng bumibili ng kanilang paninda.


***************


Isa pan'g version eh yung mga mamang pwersahang tinanggal daw sa pabrika at kasalukuyang nagwewelga dahil sa hindi makatarungang pagpapatalsik sa kanila:

"Kami po'y mga manggagawa ng [insert company name here] na sapilitang tinanggal sa trabaho dahil sa kami ay nagwelga. Hindi po kami binibigyan ng vacation leaves, sick leaves at 13th month pay ng abusado'ng kumpanya. Kasalukuyan po kaming nagsampa ng kaso laban sa kanila. Kaya kami po'y humihingi ng tulong para po may maipambayad sa aming abogado at maipagpatuloy ang aming laban"

Hindi ko alam kung maniniwala ako dito dahil minsan na ko'ng nakakita ng ganito na pagkatapos humingi ng "tulong" ay tiyempong nagshashopping sa Shangrila. Syempre iba na ang outfit nya. Disenteng disente na kumpara sa maduming t-shirt at maong na gamit nya nung umakyat siya ng bus.


***************

Heto ang hindi ko katanggap-tanggap. Mga "misyonaryo" na pagsampa ng bus ay babati ng Magandang Umaga at lilitanya ng :


"Ako po'y si [insert name here] mula sa [insert organization here] na taos puson'g kumakatok sa inyong mga puso. Kadalasan po kami'y minamaliit at pinagtatawanan dahil sa aming ginagawa. Ngunit kami po ay naparirito para ipahayag ang mabuting balita ng ating Maykapal. Ayon nga po Juan Kapitulo 3 bersikulo 16....."

Maya-maya'y manghihingi ng "donasyon" kasabay ng kasabihang hindi mo madadala sa kabilang buhay ang pera. Kaya sa kanila mo na lang ibigay. Ang nakakainis kasi dito, ginagamit pa ang pangalan ng Diyos para makapangloko ng kapwa. Hindi ko naman nilalahat pero karamihan kasi sa mga organisasyong ito ay gawa-gawa lamang at hindi nageexist sa totoong buhay.


***************

Hay! Ang sarap bumiyahe kahit malayo o matagal mapajeep man, bus o kahit pribadon'g sasakyan. Hinding-hindi mawawalan ng kwento ang bawat paglalakbay ng isang katulad ko'ng mapanuri, mapagmatyag at mapag-imbento ng kung anu-anong bagay (pero totoo naman yung mga sinulat ko sa taas). Kaya naman kahit maipit sa traffic, nagagawa ko pa ring maenjoy ang bawat byahe ng aking buhay. Hanggang sa muli. Babyahe pa ko!