Byahe'ng MRT

Araw-araw ako'ng bumabyahe mula Alabang patungong Shaw Boulevard para magtrabaho. Nakakapagod dahil sa tindi ng traffic at ingay ng mga sasakyan. Idagdag pa ang palagiang stop-over ng mga bus kung saan madalas ako'ng lulan. Ginagawang parking lot ang Ayala at Guadalupe Makati. Kadalasang kakain ng oras bago muling umusad ang bus. Kaya naman tuwing uwian, para makaiwas sa ganitong sitwasyon, minabuti ko na ang humanap ng alternatibong masasakyan. Dyan na pumapasok ang byaheng MRT. Sa halagang 12 pesos, mas mabilis ako'ng nakakarating sa Magallanes para doon maghintay ng bus papuntang Alabang. Trenta minutos ang aking natitipid na oras dahil maaga ako'ng nakakauwi sa aking tahanan.

At dahil mahilig ako'ng magkwento ng tungkol sa aking pagbabiyahe tulad ng kwentong jeepney at byaheng bus, hayaan (dahil wala rin naman kayong magagawa hehehe) n'yo ako'ng ibahagi ang aking mga karanasan sa MRT. Dalawang bagay lang naman na napansin ko sa aking malimit na pagsakay dito: Mga istilo ng bawat pasahero at mga iba't ibang mukha nila:


MGA ISTILO - may mga strategies ang ilang pasahero para madali silang makasakay ng tren.




Strategy 1 - Marami na kaming nakapila para mag-abang ng susunod na tren. Dumating ang isang mama. Pumwesto sa unahan at tumapak sa dilaw na linya. Nagsalita ang guwardiya "Usog po tayo at bawal sa yellow tiles baka mahagip ng tren". Syempre uusog ang mama at lahat kami sa likod ay mapapaurong. Ang resulta - sya na ngayon ang nasa unahan.


Strategy 2 - Nanay at tatlong paslit. Ang gagawin ng ina, pauunahing pasiksikin ang kanyang mga anak sa pagpasok sa tren. Dahil nga naman mga bata, may mga pasaherong mag-gi-give way para padaanin sila na susundan ng nanay. Ang resulta, madaling nakapasok ang mag-iina.


Strategy 3 - Isang lalaki o babae. Pagbukas ng pintuan ng tren, ilalagay nya ang kanyang kamay sa hamba para nang sa ganun ay di siya maunahan. Ginawang harang ang kanyang braso. Sa oras na makababa ang ibang pasahero, siyempre siya ang unang makakapasok sa loob.


FACIAL EXPRESSIONS - mga iba't ibang uri ng mukha sa bawat tao'ng nakasakay sa MRT


Mr and Ms. Simangot - mga tao'ng di pa nakakapasok ng tren ay nakasimangot na at tila pasan ang daigdig. Parating nakapalatak at tingin ng tingin sa relo sabay iling.


Ngiting Aso - mga ngiting tila nang-aasar. Ang iba nama'y nakangiti ng di mo alam ang dahilan. Mayroo'ng nakangiti dahil sa text message. Mayroon din namang dahil sa binabasang libro.


Dramarama - mangilan-ngilang tao na nasa sulok ng tren at tahimik na humihikbi. Malamang ay mayroong dinadalang problema.


Tulala - mga kala mo'y walang kaalam alam sa pangyayari sa paligid. Di alintana kung nagsisigawan ang katabi o pilit sumisiksik sa kanyang pwesto para makaupo. Kadalasang lumalagpas sa istasyong kanilang bababaan.




Mahirap makipagsabayan sa MRT lalo na kung ang istasyong iyong sasakyan ay mga lugar na pagkarami-raming tao. Ganunpaman, konting sakripisyo lang ang iyong kailangan para mabilis ka'ng makarating sa iyong paroroonan. Di bale nang masikip, basta't lusot sa traffic. Hanggang sa muli.