Ano Yun? Sorry na Lang?

Tingnan mo nga naman. Lunes na Lunes. Unang araw ng klase ng mga bata sa eskwela. Heksayted much sa kanilang mga bagong gamit sa pag-aaral gaya ng schoolbag at notebooks. Pero ganito ang post ko ngayon. Puno ng angst at rants. Hindi naman pwedeng ipagpaliban pa to. Dahil gusto ko'ng ilabas ang nararamdaman ko.

Akala ko madaling magpatawad. Matapos ang mga nangyari, akala ko ok na. Akala ko accepted na ang mga paliwanag. Pero ang hirap pala. Inaamin ko na nadala ako sa pag-iyak mo, pero matapos ang ilang araw ng pag-iisip, dapat pala naging mas matigas pa ko sa bato. Sabi nila, kung Diyos nga nagpapatawad, tayo pa kaya na tao lang? Pero sabi nga ni Magda ng Mula sa Puso:

"Hindi ako Diyos Fernando, kaya wag mo ko'ng luhuran. At dahil di ako Diyos, hindi ko masasabi kung kailan kita mapapatawad" 

Hindi ko na din alam kung paniniwalaan ko pa ang mga sinasabi mo. Na kesyo naiwan mo ang phone mo kakamadaling umuwi, na kesyo wala kang internet connection kaya di ka makapagonline. Sa totoo lang, nagdududa na ko sa mga kwento mo. Malay ko ba kung stealth mode ka sa YM at pinagtataguan mo ko, kami. Ikaw ba naman ang sumira ng tiwala ko, di mo ko masisisi kung bakit ako ganito ngayon sa iyo. At lalong hindi mo din masisisi ang mga tao'ng nagbigay ng kabutihan sa yo pero sinuklian mo ng atraso. Ano yun, sorry na lang? Minsan, kahit kabitan mo pa ng "super" ang salitang sorry, bale-wala ito. Dahil hindi mo alam kung gaano kalaking perwisyo ang idinulot mo. At isa pa, hihingi ka lang ng sorry sa mga bagay na hindi mo sinasadyang gawin. At sabi nga ni Dao Ming Si ng Meteor Garden:

"Kung lahat nadadaan sa sorry, para saan pa ang parak!"

Hindi ako perpekto. Minsan na din ako'ng nagkaroon ng mga pagkakamali sa buhay. Pero maipagmamalaki ko na hindi ako kailanman nagbigay ng perwisyo sa ibang tao. At hindi'ng-hindi ko sisirain ang pagkatao ko dahil lamang sa pera. Maliit man o malaking halaga, ang kredibilidad ng isang tao ay nasisira ng dahil dito. Lahat tayo may mga problemang pinapasan. Pero hindi ito rason para kalimutan at bale-walain ang tao'ng binigyan mo ng aberya. Mga tao'ng itinuring ka'ng isang kaibigan na sa bandang huli'y bigla mo'ng tinuklaw.

Sayang. Panahon na lang ang makakapagsabi kung mapapatawad ka pa namin. Damage has been done. Ang dating pagkakaibigan na kasing tibay ng pinakamatigas na metal, nabahiran na at tila isa ng kandila'ng unti-unting nalulusaw sa bawat araw. Hindi ko sinasara ang puso ko, pero ito lang ang nasisiguro ko: MAHIHIRAPAN KA NA'NG MULING MAKAPASOK DITO.