Balik-Tanaw sa mga Music Gadgets

Hindi naman talaga maipagkakaila ang hilig ng mga pinoy sa musika. Patunay na dito ang pagkakaroon ng iba't ibang patimpalak sa pag-awit gaya na lamang ng sinaunang Tawag ng Tanghalan na nasundan ng mga Star in a Million, Star for a Night, Search for a Star, Search for a Star in a Million, Pinoy Pop Superstar, Pinoy Dream Academy, Protege at kung anu-ano pa. At sino ba naman ang di alam ang mga videoke contest na Sing-Galing, Twist n Shout at The Singing Bee? Basta musika, di makakaligtas sa pinoy. Kaya naman hatid ko ang iba't ibang aparato na may kaugnayan sa musika:




Videoke. Isang makina na punung-puno ng libu-libong mga kanta. Kadalasan, malaking aparato ito na may mga numbers at sa ibabaw naman ay isang malaking tv. Matt Monro, Justin Timberlake, The Platters, Madonna man o Frank Sinatra, name it, the videoke machine has it. Lahat na yata halos ng mga uri ng kanta ay nasa videoke machine na. Ito ang karaniwang pampalipas oras ng mga pinoy. May okasyon man o wala, tila hindi magiging kumpleto ang buhay ng mga Pilipino hanggat di nakakahawak ng mikropono para kumanta. May magandang tinig man o sintunado, carry lang yan! Walang pakialaman pagdating sa libangan ng bayan.


Karaoke. ang older version ng videoke. Madalas ako'ng makakita ng karaoke tuwing sasapit ang kapaskuhan. May mga nangangaroling kasi na may dalang isang pahaba at itim na kahon na mayroong cassette tape. Pagkapindot ng play button ay uumpisahan na nilang kumanta ng "bati nami'y merry christmas at bagong taong sagana..".


Mp3 player. may 125mb, 256mb 512mb 1 gig at 2gigs. Isang maliit na aparato na pwedeng lagyan ng iba't ibang uri ng kanta depende sa laki ng memorya ng nasabing device.

Mp4 player. Mas hightech sa mp3 player dahil pwedeng installan ng mga music videos ng paborito mo'ng artists. Mas mahal ng konti sa mp3 player. Problema lang sa mga ganitong aparato, di tumatagal ang baterya.

Ipod - may shuffle, nano, video at touch. Depende sa modelo, mas mahal ang presyo. Mas tumatagal ang battery life. Mas maraming kanta at bidyo ang pwedeng maistore kasama na ang ebooks at photos.

Walkman - noong unang panahon na hindi pa uso ang mga cds at cassette tapes pa ang naghahari, ito ang "in". Kasing laki ng pocketbook at kadalasang may tatak ng sony. Lagyan lang ng cassette tape at patugtugin. May fm/am radio pa! High tech diba?

Discman - ang tumalo sa walkman. CD naman ang inilalagay para patugtugin. High tech ka pag pwedeng magpapatugtog ng mp3 formats ang discman mo at may antishock technology para hindi tumalon ang mga songs sakaling maalog mo ang aparato.

Turn Table - mas luma sa walkman. Usung uso noong kapanahunan pa ni Nora Aunor. Nilalagyan ng mga plaka (malaking CD na kulay itim) para patugtugin. Meron pa ko nito hanggang ngayon pero display na lang siya at di na tumutugtog.



At dito nagtatapos ang artikulong ito. Marami pa'ng hindi nailagay sa listahan. Hanggang sa muli mga kadamo.